Չեխիայում ՀՀ դեսպանի հանդիպումը ՉՀ Խորհրդարանի Պատգամավորների պալատի Չեխիա-Հայաստան բարեկամական խմբի հետ

14 մարտի, 2019

Մարտի 14-ին ՉՀ-ում ՀՀ դեսպան Աշոտ Հովակիմյանը հյուրընկալվել է Չեխիայի Հանրապետության խորհրդարանի պատգամավորների պալատի Չեխիա-Հայաստան բարեկամական խմբի կողմից։

Խմբի ղեկավար՝ Սահմանադրական և իրավական հարցերի կոմիտեի նախագահ, Քաղաքացիական ժողովրդավարական կուսակցությունը ներկայացնող Մարեկ Բենդան ողջունեց, շնորհավորեց և արգասաբեր գործունեություն մաղթեց ՀՀ նորանշանակ դեսպանին։

Դեսպան Հովակիմյանն իր երախտագիտությունը հայտնեց ՉՀ խորհրդարանի կողմից Հայոց ցեղասպանության ճանաչմանն ուղղված բանաձևի ընդունման առթիվ՝ բարձր գնահատելով այն մեծ աշխատանքն ու ճանապարհը, որ իրականցվել է երկու երկրների Խորհրդարանների և ՉՀ-ում ՀՀ դեսպանության արդյունավետ աշխատանքի շնորհիվ։ Նա հույս հայտնեց, որ ապագայում ևս այդ համագործակցությունը կշարունակվի նույնքան բարձր մակարդակով։

ՀՀ դեսպանը ներկայացրեց հայ-չեխական երկկողմ բարեկամական հարաբերությունների ներկայիս վիճակը, ՀՀ արտաքին քաղաքականության առաջնահերթությունները, միջխորհրդարանական երկկողմ հարաբերությունները, պարզաբանեց ԼՂ հիմնահարցի կարգավորման շուրջ ՀՀ դիրքորոշումը։ Դեսպանը պատասխանեց նաև պատգամավորների բազմաթիվ հարցերին՝ ՀՀ ներքին քաղաքական և տնտեսական իրավիճակի, Հայաստան-Չեխիա ապրանքաշրջանառության, ՀՀ արտահանման ներուժի, Հայաստանի համար IT ոլորտի կարևորության վերաբերյալ։

ՀՀ դեսպանն անդրադարձավ նաև ԵՄ-Հայաստան համապարփակ և ընդլայնված գործընկերության պայմանագրի վավերացման գործընթացին, նշելով վերջինի կարևորությունը ՀՀ համար և հույս հայտնելով, որ ՉՀ Խորհրդարանի կողմից փաստաթղթի վավերացումը կարագացվի։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր